Jab kuch saal apna kaam karne ke baad bhi, der raat, sone se pehle, insaan gehen chintan mein yeh sochta hai, ki main kya kar raha hun, kyun kar raha hun, kaise kar raha hun, theek kar raha hun, kal kya karunga, aage kya hoga, jo kiya wo sahi kiya, jo hoga wo sahi hoga? It is called the road less travelled for a reason, kyunki yahan raaste bhi khud banane padte hain, aur raahein bhi khud chunni padti hain. Yun to life mein kaafi kuch likha hua hai, lekin bina sign board ke aage chalne mein kaafi darr lagta hai. Darr kal bhi lagta tha, darr aaj bhi lagta hai, kal kisi aur baat ka tha, aaj kisi aur baat ka hai, lekin kahin na kahin yeh darr hi hai jo insaan ko chalaye rakhta hai, kuch na kuch naya karne ke liye aage badhaye rakhta hai. Jitna karlo kam hai, aur ek khushi mili, to koi aur gham hai. Aisi koi bahut badi top cheez nahin hai entrepreneurship, lekin bas jeene ki ek atpati, chatpati, khatarnaak, aaraamdayak, surprises aur shocks se bhari raah hai. Is raah par chalna hi entrepreneurship hai, aur is par chalne ka kuch ajeeb sa mazaa hai. Kabhi chal ke dekhna, band baj jaayega, darr aur khatra bhi free mein saath aayega, kahin pahuch gaye to ban gayi baat, nahin bhi pahuch paaoge, to kuch aisa seekh kar jaaoge jo tahe zindagi bahut kaam aayega 🙂
